У Гарадоцкай цэнтральнай раённай бібліятэцы прайшла тэматычная праграма «Пятніца, 13»

У гэты дзень, прымеркаваны да Дня бібліятэк, супрацоўнікі прапанавалі наведвальнікам рознага ўзросту шмат сюрпрызаў. Былі прадстаўлены кніжныя выставы «Мистическая библиотека», «Гоголь — великий мистификатор» і «Уж-ж-жасная литература». У бібліакафе «Бессонница» можна было выпіць кубак духмянай гарбаты, а таксама даведацца значэнне сваіх сноў.

Дзеці навучыліся вырабляць шнуры-талісманы і наведалі майстар-клас па аквагрыме пад назвай «Арт-пятница». Конкурс «Спроси у паука» даў магчымасць юным чытачам за правільныя адказы на пытанні атрымаць салодкія прызы. Хлопцы і дзяўчынкі прынялі ўдзел у квэст-гульне «Сумеречная зона», наведалі «пакой страху», з заплюшчанымі вачыма прайшлі «лесвіцу перашкод», шукалі кажаноў, апраналіся ў мумій, танцавалі і проста весяліліся. У фотазоне «Паутина» ўдзельнікі мерапрыемства зрабілі памятныя здымкі.

Бібліятэкары — захопленыя людзі, прыхільнікі сваёй справы, яны падыходзяць да прафесіі творча, актыўна рэалізуюць разнастайныя праграммы і праекты. Адзін з такіх праектаў — «Чытаем разам па-беларуску». Яго мэта — пазнаёміць дашкольнікаў і малодшых школьнікаў з беларускай культурай і літаратурай, з дзяцінства выхаваць любоў і павагу да роднай мовы і беларускага народа.

Бібліятэкары арганізуюць краязнаўчыя вандроўкі і дні жартаў, паказваюць лялечныя спектаклі, чытаюць з дзецьмі беларускія народныя казкі, знаёмяць з творчасцю беларускіх пісьменнікаў і паэтаў.

Майя САЛДАЦЕНКА.

http://www.garadvest.by

 

Гісторыя Езярышча на старонках кнігі «Азярышча” Вячаслава Якімава – заслужанага юрыста Беларусі

Вячаслаў Васільевіч Якімаў, “Заслужаны юрыст Беларусі”, былы старшыня Верхнядзвінскага суда ў 2019 годзе выдаў у Наваполацку кнігу “Азярышча”, прысвечаную паўночнай старонке Гарадоцкага краю – Езярышчу.
Адмысловая назва кнігі “Азярышча” адразу накіроўвае чытача ў глыбіню стагоддзяў, калі першае дастаткова вядомае паселішча нашага краю называлася па-крывіцку – Азярышча. І чытач рухаецца ў глыбіню стагоддзяў з любоўю да роднага краю, як туды рухаецца шаноўны Вячаслаў Васільевіч, распавядаючы пра гісторыю сваёй зямлі, якая дала яму жыццё.

Аўтар называе свой уступ у кнігу “Удзячнасць” і піша:
“Бог даў долю пражыць дзяцінства, юнацтва і пачатак сталасці ў гэтым непаўторным краі, які зараз прыходзіць ў заняпад.
Абавязак удзячнасці да роднай зямлі – як мага болей даведацца пра яе гісторыю, каб сказаць землякам: “Не! Мы не бязродныя, мы маем такую мінуўшчыну, якой трэба толькі ганарыцца”.
…Адраджэнне Гісторыі і Мовы – ганаровая справа кожнага, бо, як лічыцца са старажытных часоў, на годнасці і павазе да мінулага, да нашых вялікіх продкаў засноўваецца будучыня народа.”
У анатацыі да кнігі Вячаслаў Васільевіч напісаў, што гэта – “Гістарычны нарыс, прысвечаны прыгожаму куточку на мяжы Беларусі і Расіі -малой радзіме аўтара. На старонках кнігі ў навукова-папулярнай форме апісана багатая на падзеі драматычная гісторыя краю з далёкай мінуўшыны да нашага часу”.
У кнізе шмат мап, схем, ілюстрацый, якія робяць кнігу карысным для вывучэння гісторыі малой Радзімы – Азярышча. Таксама ў кнізе даюцца экскурсы ў беларускую міфалогію, прыводзяцца цікавыя назіранні аб старажытнай гісторыі азярышчанскага края і тых асобаў, якія кіравалі гэтай зямлёй у розныя стагоддзі. Па новаму глядзіцца і гісторыя нашай зямлі ў часы Вялікага Княства Літоўскага.
Наогул кніга “Азярышча” напісана з пазіцыі беларускага патрыятызму, якога нам зараз вельмі бракуе, каб адчуць сябе адказнымі за лёс сваёй зямлі.
Твор Вячаслава Якімава “Азярышча” – тая кніга, якую варта вывучаць ўсім азярышчанцам, жыхарам Гарадоцкага раёна, каб ведаць свае карані на беларускай зямлі. І наклад у 25 асобнікаў – гэта толькі стартавы, які зрабіў сам аўтар, каб данесці свае веды і сваю любоў да роднага краю ўдзячным чытачам.
Леанід Гаравы