Кошкіна – цудоўная мясціна, якая знаходзіцца ў трох кіламетрах ад вёскі Лахі.
У пачатку XX стагоддзя гэта была вёска з 59 жыхарамі, дзе працавала школа граматы і вялі гаспадарку ў 17 дварах. У кастрычніку 1942 года, нямецка-фашысцкія акупанты спалілі вёску і загубілі 4 жыхароў. У 1960 годзе вёска аднавілася, і у ёй налічвалася 84 жыхары. Хлопцы з Кошкіна ўзялі замуж дзяўчат з суседняй вёскі Альшанікі і пачалося мірнае і працоўнае жыццё.
Было тут і месца спевам і музыкі. Святкаваліся вяселлі і хрэсьбіны, святы народнага календара – Каляды, Купалле, Зажынкі, Дажынкі, ладзіліся вячоркі, на якіх гучна іграў гармонік і танчылі любімыя танцы : Кракавяк, Ленцея, Падыспань, Зялёную рошчу, Барыню, Каробачку, Сямёнаўну і інш.
Вельмі прыемна, што у экспедыцыі нам давялося сустрэцца з пастаяннымі жыхарамі вёскі Кошкіна: Ягоравай Лінай Яфімаўнай (1934 г.н.) Котавай Раісай Фёдараўнай (1931 г.н.), Мінавымі Надзеяй Іванаўнай і Генадзем Фёдаравічам Мінавым (1940 г.н.).
Працалюбівы гаспадар, добразычлівы і абаяльны чалавек, таленавіты гарманіст – Генадзь Мінаў, ён заўсёды быў “легкі на ўздым”. Амаль 20 год не браў у рукі гармонік, але узяўшы і пачаўшы іграць польку зразумеў, што памятае забытыя мелодыі , і твар сталага чалавека змяніўся, засіялі вочы і мы нібыта апынуліся у тых 60-тых… І зазвінела — Барыня і Каробачка, вальс і прыпеўкі.
Як расказвае Ліна Ягорава раней ні адно свята не абыходзілася без гарманіста. У ёй чацвера дзяцей і усе вяселлі іграў Генадзь Мінаў.
Генадзь Фёдаравіч Мінаў
У пачатку стагоддзя ткацтва было асноўным захапленнем яе матулі, на жаль не захаваліся кросны, а з работ засталіся толькі “палавікі”. Сама Ліна Яфімаўна распавядала пра жыццё ў маленстве і юнацтве, святы народнага календара і вясельныя спевы.
Ліна Яфімаўна Ягорава
Носьбіт фальклорных традыцый Раіса Котава шмат расказала пра сваю вёску і старажытныя святы, якія праводзіліся ў мястэчку. Закаханая у родныя прасторы яна жыве ў Кошкіна з 1955 года, памятае і цяжкую працу і добрыя гучныя песні у выкананні мясцовых дзяўчат і жанчын, а у вечары танцы пад гармонік .
