На вакацыях у Цэнтры дзяцей і моладзі дзейнічала выстава і праводзілі віртуальныя экскурсіі

У ДУДА «Гарадоцкі раённы цэнтр дзяцей і моладзі» асаблівае месца адводзіцца арганізацыі занятасці дзяцей і падлеткаў у канікулярны час. На зімовых вакацыях працягнулі працу аб’яднанни па інтарэсах. Педагогі і навучэнцы Цэнтра прынялі ўдзел у дабрачынным ранішніку. Яшчэ на працягу канікул дзейнічала выстава работ дэкаратыўна-прыкладнай творчасці «Зімовыя фантазіі».


Намеснік дырэктара Я.Ч. Каўкенава заўсёды гатова правесці віртуальную экскурсію «Экалогія вачыма дзяцей» для навучэнцаў школ горада і раёна. Вось і на зімовых вакацыях выхаванцы аздараўленчага лагера «Чайка» ДУА «СШ № 2 г. Гарадка» з цікавасцю пабывалі на віртуальнай экскурсіі.
Л. Антонаў

Па матэрыялах: http://cdim.gorodok.edu.by

База Снягуркі на бас-востраве гатова прымаць гасцей

22 снежня амаль завяршылася падрыхтоўка базы Снягуркі на бас-востраве для прыёма дзяцей і дарослых. Па задуме арганізатараў Снягурка і яе памагатыя будуць сустракаць гасцей на інтэрактыўных пляцоўках, якія размешчаны каля хаты Снягуркі.
На базу Снягуркі магчыма трапіць як ад лыжаролернай трасы праз мост, дзе афіцыйны ўваход, так і з боку вуліцы Зялёнай. Камунальнікі разам з электрыкамі для асвятлення базы Снягуркі працягнулі ад падстанцыі па вул. Зялёнай электракабель на адлегласць больш кіламетра, а таксама амаль завяршылі ілюмінацыю самой базы, як ўвахода так і хаты Снягуркі. Дарэчы майстр камунальнікаў казаў, што база будзе асвятляцца што дня ў вячэрні час, як і вуліцы Гарадка.

Для наведвальнікаў будзе цікава азнаёміцца са зместам базы і тымі казачнымі персанажамі, якія тут будзе магчыма сустрэць, калі замовіць экскурсію ў гаспадароў базы — аддзела ідэалогіі, культуры і спраў моладзі Гарадоцкага райвыканкама.

Відавочна, што гэта значны плюс у турыстычны патэнцыял Гарадоччыны і многае будзе залежыць ад стварэння іміджа базы Снягуркі на Віцебшчыне і яе далейшае ўдасканаленне. Таксама зразумела, што многае залежыць ад таго ці выберуць мясцовыя вандалы сваім аб’ектам хуліганства цікавую базу. І камеры відэаназірання адназначна не пашкодзяць дабы не было тут так як з крэсламі на стадыёне.
Л. Антонаў
Фота аўтара

Фота прэўю групы https://vk.com/sportivnijgorodok

У Гарадку ўрачыста адзначылі 75-ю гадавіну вызвалення Гарадоччыны ад нямецка-фашысцкіх захопнікаў. Відэа

22 снежня ў райцэнтры адбыліся ўрачыстасці прысвечаныя 75-гадавіне вызвалення Гарадка і раёна ад нямецка-фашысцкіх захопнікаў. Ва ўрачыстасцях прыняў удзел пасол Арменіі ў Беларусі Армен Гевандзян, старшыня Віцебскага аблсавета У.У. Цярэнцьеў і іншыя госці з Віцебска.
Урачыстасці пачаліся з ускладання гірлянды Славы да памятнага знаку 12-ці часткам і злучэнням, якія вызвалялі Гарадок ад нямецка-фашысцкіх захопнікаў з удзелам прадстаўнікоў вайсковай часткі і высокіх гасцей.
Непасрэдна урачыстасці пачаліся каля помніка двойчы Герою Савецкага Саюза, Маршалу Савецкага Саюза І.Х. Баграмяну. Спачатку адбылося ўскладанне вянкоў, а потым прывітальныя словы сказалі пасол Арменіі ў Беларусі Армен Гевандзян і унук Маршала І.С. Баграмян.

Далей адбылося ўрачыстае шэсце прадстаўнікоў арганізацый, працоўных калектываў і навучэнцаў Гарадка з аркестрам да цэнтральнай плошчы горада.

На цэнтральнай плошчы адбыўся мітынг «Славім салдацкі подзвіг», на якім выступілі Уладзімір Цярэнцьеў — старшыня Віцебскага аблсавета, Пётр Карабач — старшыня Гарадоцкага райвыканкаму і іншыя госці свята.
Завяршыўся мітынг ускладаннем вянкоў і кветак на мемарыял «Няўміручасці» ад высокіх гасцей, калектываў Гарадка і ўдзельнікаў мітынга.

Пасля ўскладання вянкоў і кветак адбылося паказальнае выступленне байцоў 103-й Віцебскай асобнай гвардзейскай паветрана-дэсантнай брыгады.

Далей свята прадоўжылася ў Гарадоцкім ДК, дзе была арганізавана экспазіцыя «Мы помнім! Мы ганарымся!», дзейнічалі інтэр-актыўныя пляцоўкі і адбылося музычна-тэатралізаванае прадстаўленне «Да Перамогі шоў, Айчына, твой салдат!».

Святочныя мерапрыемствы завяршыліся працяглым фейерверкам на цэнтральнай плошчы.

Л. Антонаў