Monthly Archives: August 2021

Гарадоцкі Дом рамёстваў і фальклору годна выступіў на абласным свяце аматарскіх аб’яднанняў “Яблачны фэст” у вёсцы Алашкі Шаркаўшчынскага раёна.

У гэтым свяце прынялі удзел творчыя калектывы 17 раёнаў Віцебскай вобласці і гарадоцкі майстар Васіль Сіманковіч стаў лаурэатам І ступені ў намінацыі “Прэзентацыя выставы народных вырабаў майстэрні “Яблачны фэст”. Твор нашага майстра  “Яблыка на Спас”  з саломкі зроблена вельмі якасна і прафесійна і найлепш адпавядала духу фэста ў Алашках, дзе ўшаноўваецца дзейнасць селікцыянера-аматара Івана Сікоры.

Гарадоцкая дэлегацыя з чатырох работнікаў Гарадоцкага Дому рамёстваў і фальклору ад аб’яднання “Зялёная альтанка”: Марыя Шпакава, Васіль Сіманковіч, Віктар Камышоў, Валянціна Шатэра ўпершыню удзельнічала ў свяце “Яблачны фэст”.

 

Удзельнікі дэлегацыі  былі задаволены яго узроўнем і магчымасцю атрымаць новыя ўражанні і знаёмства, пабачыць прыроду Шаркаўшчыны, надыхацца цудоўным паветрам Радзімы Івана Сікоры каля сажалкі з лілеямі і не толькі.

Твор нашага майстра  “Яблыка на Спас” зараз магчыма пабачыць у Гарадоцкім Дому рамёстваў і фальклору, дзе і дзейнічае аматарскае аб’яднанне “Зялёная альтанка”. Дарэчы жыхары Гарадка ў ім могуць навучыцца розным народным рамёствам.

 

Больш пра свята тут: https://vitvesti.by/kultura

Фота Марыі Шпакавай і аўтара.

Л. Антонаў

Юбілейны «Бульбяны фэст» прайшоў у аграгарадку Германавічы Шаркаўшчынскага раёна

У аграгарадку Германавічы Шаркаўшчынскага раёна прайшоў юбілейны, пяты па ліку, «Бульбяны фэст». Лейтматывам урачыстасці сталі словы вядомага беларускага паэта Ніла Гілевіча «Мой край, мой рай бульбяна-жытны».

Паветра напаўняў водар толькі што спечаных дранікаў, а на сцэне гучалі беларускія народныя песні, прыказкі, прымаўкі пра бульбу, віноўніцы ўрачыстасці прысвячалі вершы.

На свяце прысутнічала шмат гасцей, сярод іх была ідэйны натхняльнік фэсту ў Германавічах, мясцовая жыхарка Ада Райчонак. Яе прапанову ў свой час падхапілі работнікі культуры, дадалі яркіх, непаўторных «нотак» смачнаму дзейству, якое стала сапраўды брэндавым.

Кульмінацыяй «Бульбянога фэсту» прызналі «Бульба-шоу». Гэта трэба было не толькі ўбачыць, але і абавязкова паспрабаваць. Па выніках творчага спаборніцтва брэндам года ў намінацыі «За арыгінальную страву» журы выбрала «Кляцак» з мясной начынкай, што прыгатаваны па даўнішняму рэцэпту супрацоўнікамі аўтаклуба Шаркаўшчынскага РЦК.

Іншыя канкурсанты не адставалі ў экстравагантнасці і крэатыўнасці. На суд журы і гледачоў былі прадстаўлены бульбяны шашлык з кавалачкамі сала, печаная «Бульбяная панна» са шкваркамі, бульба, фаршыраваная грыбамі, і шмат іншых страў.

Супрацоўнікі сельвыканкама атрымалі прыз глядацкіх сімпатый «За самыя смачныя дранікі». На працягу некалькіх гадзін ля святочнай сцэны яны спраўна пяклі румяныя «сонейкі» на палаючай калодзе. Пяклі і раздавалі ўсім жадаючым. Ніхто дамоў не пайшоў галодны.

Асаблівая прыкметнасць «Бульбянога фэсту» ў Германавічах – свята заўсёды атрымліваецца сямейным. Мясцовыя гаспадыні дзяліліся сваімі сакрэтамі прыгатавання старадаўніх страў, падкрэслівалі, што традыцыі і звычаі продкаў забываць нельга, у іх – душа і самабытнасць беларускага народа.

Диана Берникович

Фота Сяргея РАЙЧОНКА

https://vitvesti.by/kultura