Гісторыя Езярышча на старонках кнігі «Азярышча” Вячаслава Якімава – заслужанага юрыста Беларусі

Вячаслаў Васільевіч Якімаў, “Заслужаны юрыст Беларусі”, былы старшыня Верхнядзвінскага суда ў 2019 годзе выдаў у Наваполацку кнігу “Азярышча”, прысвечаную паўночнай старонке Гарадоцкага краю – Езярышчу.
Адмысловая назва кнігі “Азярышча” адразу накіроўвае чытача ў глыбіню стагоддзяў, калі першае дастаткова вядомае паселішча нашага краю называлася па-крывіцку – Азярышча. І чытач рухаецца ў глыбіню стагоддзяў з любоўю да роднага краю, як туды рухаецца шаноўны Вячаслаў Васільевіч, распавядаючы пра гісторыю сваёй зямлі, якая дала яму жыццё.

Аўтар называе свой уступ у кнігу “Удзячнасць” і піша:
“Бог даў долю пражыць дзяцінства, юнацтва і пачатак сталасці ў гэтым непаўторным краі, які зараз прыходзіць ў заняпад.
Абавязак удзячнасці да роднай зямлі – як мага болей даведацца пра яе гісторыю, каб сказаць землякам: “Не! Мы не бязродныя, мы маем такую мінуўшчыну, якой трэба толькі ганарыцца”.
…Адраджэнне Гісторыі і Мовы – ганаровая справа кожнага, бо, як лічыцца са старажытных часоў, на годнасці і павазе да мінулага, да нашых вялікіх продкаў засноўваецца будучыня народа.”
У анатацыі да кнігі Вячаслаў Васільевіч напісаў, што гэта – “Гістарычны нарыс, прысвечаны прыгожаму куточку на мяжы Беларусі і Расіі -малой радзіме аўтара. На старонках кнігі ў навукова-папулярнай форме апісана багатая на падзеі драматычная гісторыя краю з далёкай мінуўшыны да нашага часу”.
У кнізе шмат мап, схем, ілюстрацый, якія робяць кнігу карысным для вывучэння гісторыі малой Радзімы – Азярышча. Таксама ў кнізе даюцца экскурсы ў беларускую міфалогію, прыводзяцца цікавыя назіранні аб старажытнай гісторыі азярышчанскага края і тых асобаў, якія кіравалі гэтай зямлёй у розныя стагоддзі. Па новаму глядзіцца і гісторыя нашай зямлі ў часы Вялікага Княства Літоўскага.
Наогул кніга “Азярышча” напісана з пазіцыі беларускага патрыятызму, якога нам зараз вельмі бракуе, каб адчуць сябе адказнымі за лёс сваёй зямлі.
Твор Вячаслава Якімава “Азярышча” – тая кніга, якую варта вывучаць ўсім азярышчанцам, жыхарам Гарадоцкага раёна, каб ведаць свае карані на беларускай зямлі. І наклад у 25 асобнікаў – гэта толькі стартавы, які зрабіў сам аўтар, каб данесці свае веды і сваю любоў да роднага краю ўдзячным чытачам.
Леанід Гаравы

Юныя лыжнікі з Расіі з радасцю наведалі Дом рамёстваў і фальклору і асвойвалі азы народнай творчасці

У Гарадку ў апошнія гады шмат спартсменаў з Расіі трэніруецца на лыжаролернай трасе, а таксама маюць магчымасць пазнаёміцца ​​з Гарадком і яго культурнымі аб’ектамі. Нашы госці заўсёды застаюцца рады наведванню Гарадоцкага краязнаўчага музея і Гарадоцкага Дома рамёстваў і фальклору.

Не стала выключэннем і апошняя група юных лыжнікаў з горада Краснае Сяло Ленінградскай вобласці Расійскай Федэрацыі. У сярэдзіне жніўня хлопчыкі і дзяўчынкі пасля чарговай трэніроўкі пабывалі ў нашым Доме рамёстваў.

Для хлопчыкаў народны майстар Рэспублікі Беларусь Вольга Рэут дала майстар-клас па саломопляценню. І хлопцы з задавальненнем пачалі асвойваць асновы гэтай традыцыйнай народнай творчасці беларусаў, зрабіўшы асноўны элемент саламянага павука.

Майстар Дома рамёстваў Настасся Савасцеева ў гэты час займалася з дзяўчынкамі, навучаючы іх стварэнню народнай беларускай лялькі. Яна прадэманстравала народныя лялькі ў стылі мотанкі-абярэгавай і вандроўніцы.

Юныя спартсменкі былі рады таму, што ў іх атрымалася стварыць сваю ляльку мотанку.

Падобныя візіты ў Дом рамёстваў спрыяюць далучэнню гасцей да нашай беларускай народнай культуры праз практычны урок стварэння.

Л. Антонаў